Omaj pou
fanm sou latè
Ou pa janm panse yon nati san pyebwa
Ou pa janm panse yon planèt san dlo
Rete ! Ou pa janm panse yon mond san espwa
Annou di, e si limanite pat janm fè nou kado
Annou di ou se fanm tèt sous kote lavi soti
Annou di ou se fanm poto djanm, byen taye ki kenbe limanite
Annou di ou se fanm sèl rezon ki fè lavi souri
Annou di ou se fanm nanm lanati, solèy ki klere lavi
Annou di ou se fanm boul limyè ki klere linivè san kanpe
Annou di ou se fanm souf ki fè lavi pa fini
Ou se mistè paske ou pa taye ni ak labou ni ak latè
Ou se mistè ki parèt nan somèy lèzòm tankou zèklè
Ou lou ou fout gou ou dous ayayay ou se yon kreyati san erè
Kote jipitè ak latè kwaze pou bare yon sekrè kap boule tout kè
Lè ou kanpe mwen tonbe
Lè ou mache pye m kanpe
Lè ou chita mwen sou jenou map ranpe
Lè ou kouche wo y ! Tèt mwen pati map reve
Onè ak respè pou ou, fanm ! ou se lavi ou se plezi
Konpliman pou ou, fanm ! ou se rèn, ki fèm dòmi
Respè pou ou, fanm ! prensès mwen, espwa m ki fèm souri
Ou se Fanm oksijèn limanite sous lapè ki kache sekrè lanati.
Lee Michel, 8 Mas 2019
